Gen 44 | WSK | STEP | Joseph ko kawam bitua kari gira mu maonam, “Kari ari mu nunga na gimonko mu terong ma la nunga korokem tugu tugu nungaruko. Ale nomoke nomoke nunga manga korokem kuringi tugu tugu nungaruko.

Genesis 44

Yu te na ko bagunang yumuram

1 Joseph ko kawam bitua kari gira mu maonam, “Kari ari mu nunga na gimonko mu terong ma la nunga korokem tugu tugu nungaruko. Ale nomoke nomoke nunga manga korokem kuringi tugu tugu nungaruko. 2 Se nunga uria gotek mu ko korokem ningi aninga bagunang silver yu te nasam mu se, ko inang, se ko manga buta karogo tugu tuiko.” Se ura kari Joseph balam butata beteram.

3 Tumong biyala Joseph ko launuria nunga mel giman, ale nunga donkey ago arataman namakasan. 4 Nuna wonong biya mu beteman ale namaman nomolak me maiyam Joseph ko kawam bitua kari maonam, “Ni bares ale tairate kari namasan wore nogowom karoko. Tom nama nongote aratu mu iwita nunga manaruko, ‘Nina awuk se ana kilek ningo ningimik te beteman wore ko koma kilek memek ananangate beteman? 5 Nina anape ko aninga kari biya ko bagunang silver wore tere taman? Kari biya bagunang oworta te yu naso, ale te mel tom udagi aratukko mu ko ikiso. Nina kilek memek nunguningkiri beteman,’ uwutata nunga manaruko.”

6 Se Joseph ko ura kari nogowom kaoram ale nongote nama aratam ale butata nunga maonam. 7 Se nuna den koma balman, “Biya,” maman, “ni anape ikia ago se den sumu buta balsam? Ana munan bo suwuta me betenakko pa! 8 Ni ikisam, ana manga inang ko korokem ningi aniram karogo Canaan namaman ale aringiman mu aking giman ago taiman se ni arigem. Se ni awuk ikisam ana silver se gold ka kari biya ko kawam te tere naman wore ko balsam a? 9 Kari, mel balem mu awiriya ko korokem ningi arik, mu kari mu am kuerukko, se ana suen la nika ura dungan kari ko aratanakko.”

10 Se ura kari balam, “Mu terong. Bare kari bagunang tam umutang la diram aninga ura dungan kari ko aratukko. Se nina saki am namaralko.”

11 Se nuna tairatela nomoke nomoke nunga korokem kututuwu aliti awuman ale kuring uruku gilingiman. 12 Se Joseph ko ura kari bagunang ko korokem ningi loaga loaga taikaso. Nu giram nunga laun ko korokem ningi loagaram ale eng nama mom kopa mu te tai aratam. Ale bagunang mu Benjamin ko korokem ningi arigam. 13 Se laun ari suen la mel mu aringiman ale nunga guang iluman barurumu gilingiman ale nongomang batagakaso. Ale nunga korokem gi donkey te awuman ale peleman wonong biya mu te aking namakasan.

14 Se tom Judah ko launuria ago tai Joseph ko kawam te arataman, mu Joseph am ko kawam te bagaram. Se aringiman ale nguangakasan, ale nama nu koma dugu te nubugara kulukuru gilingiman. 15 Se Joseph nunga isuam, “Nina awuk beteman? Nina ikisan ani mel udagi aratukko mu te arigek ikiekko ko kilek kilek agate mena i masan e?”

16 Se Judah balam, “Kari biya,” mam, “ana awuk balnakko? Ana memek imi awuk la nungurnakko mu me terong. Kaem anananga memek wetang te beteram. Se ana aitak suen la nika ura dungan kari, ana se kari noko korokem ningi nina bagunang aringiman mu agotala.”

17 Bare Joseph balam, “Mena. Ani buta me bitirikkowo. Kari bagunang noko korokem ningi aringiman umutang kota suwanta diram aninga ura dungan kari ko bagurukko. Se nina mena mu, peleral ninga ba kote namaralko. Nengemang lila te namaralko.”

Judah Benjamin kuwim taukko Joseph isuam

18 Se Judah Joseph kote namaram ale isuam, “Kari biya, ani kerak munakirikko wore ago ko me gemang magurukko. Ni kari biya Pharaoh iwitatala. 19 Se ni giringila la anananga isem, ‘Nenenga nenet ago e? Se ninga uria bo ago anisan agi mena e?’ ma balem. 20 Se ana balman, ‘Nanga nainet garuk nunguningkiri, se nanga uria gotek tom nanga ba garuk ningi bagaram se bilangaram mu ago. Se nanga uria mu ko laun mu giram kueram. Nuna ilagala nunga nunam nunga iluwam, bare nu kota suwanta bagoso. Se ko nuet ninguru ko kueso.’ Ana uwuta nika manorman. 21 Se ni ana nu ilak nikate tainak se arikko balem. 22 Se ana balman ana nanga uria ilak me tainakko maman. Nu ko nuet bitiruk mu nuet kuerukko maman. 23 Bare ni balem, ‘Ninga uria ilak me tairal, mu aninga amakete me tairalko,’ ma balem. 24 Se ana peleman nanga nainet, nika ura dungan kari, kote namaman, ale den ni balem mu nu manorman se ikiam.

25 “Se udagi te nu balam, ‘Peleral namaral ale na sang diaralko,’ mam. 26 Bare ana balman, ‘Ana me namanakko. Ana nanga uria nangarak me namuruk mu ana kari biya mu ko koma te me aratanakko nunguning! Bare nanga uria nangarak namuruk mu ana namanakko.’

27 “Se anananga nainet iwita balam, ‘Nina ikisan, aninga imet Rachel mu kuriang ilagala mu la nunga iluwam. 28 Bo maingkala aga beteram, se ani aitak nu kumik me arigisam. Mel daong mu moa gilingiman agila. 29 Se aitak nina aking suwan imi tal ale ilak namaralko kaesan. Se nu memek arigok ale kueruk, mu nina ani angamang bataga tawun biya aisalko. Ani maingkala garuk, se angamang bataga mu aga menawurokkowo,’ mam.

30 “Anananga nainet butata balam. Se kari biya, ani ipi pelerik aga ba kote namirikko me terong. Benjamin agarak me namuruk se arigok, mu ani ikisam, nanga nainet mu kuerukkowo. Nanga nainet mu garuk nunguningkiri. Kuriang mu noko gomang motam nunguningkiri, se gotek mu nangarak me peleruk namuruk, mu nanga ba kota ko gomang bataga mu moruk se kuerukkowo. 32 Aninga ba koma te iwita balem, ani aga uria ilak me pelerik kote namirik se arigok, mu ikup memek dolara mu aningate aniruk nama tom ani kuerikko. 33 Butata se ani kuriang gotek mu kuwim taik ale nika ura dungan kari ko bagirikko. Se nu bitar se ko laun ari sang arungu peleruk ko nuet kote namurukko. 34 E ani kuriang sumu ilak me pelerik mu, ani awuk pelerik aga ba kote namirikko? Ani ikup imi aninga ba kumik te aratuk se arigekko me ko kuesam.”